ಶಾರದಾ ಸ್ಥಾಪನೆ

ಚಂಡ ಮುಂಡರ ಸಂಹರಿಸಿದ ದೇವಿಯ ಪೂಜೆಯ ದಿನ,
ಭಕುತಿಯಲಿ ಬೇಡುವೆವು ತಾಯೆ ನಿನ್ನ ಅನುದಿನ.
ಸಿಂಹಾರೂಢಾಯೈ ನಮಃ ಎನ್ನುತ ಮುಗಿವೆವು ಕರ,
ಕರುಣಿಸು ತಾಯೆ ಸಲಹು ನಮ್ಮ ಈ ಅಲ್ಪ ಜನರ!
ಸ್ವರ್ಣವಸ್ತ್ರದಿ ಮಿನುಗುತಿಹಳು ದಿವ್ಯ ಸ್ವರೂಪಿಣಿ,
ಗಂಧ ಪುಷ್ಪಗಳ ಅಲಂಕಾರದಿ ಕಂಗೊಳಿಸುವ ರಾಜರಾಜೇಶ್ವರಿ ಚೂಡಾಮಣಿ.
ಸ್ವರ್ಣವಲ್ಲೀ ಕ್ಷೇತ್ರದಲಿ ನೆಲೆಸಿಹ ಜಗನ್ಮಾತೆಯ ದರ್ಶನ,
ಕಂಡು ಧನ್ಯವಾಯಿತು ಇಂದು ನಮ್ಮ ಈ ಜೀವನ!

ಶ್ರೀ ಸೋಂದಾ ಸ್ವರ್ಣವಲ್ಲೀ ಮಹಾಸಂಸ್ಥಾನದ ಪವಿತ್ರ ಸನ್ನಿಧಿಯಲ್ಲಿ, ಉಭಯ ಶ್ರೀಗಳ ಅಮೃತ ಹಸ್ತಗಳಿಂದ ಪೂಜಿಸಲ್ಪಡುತ್ತಿರುವ ಶ್ರೀ ರಾಜರಾಜೇಶ್ವರಿ ದೇವಿಯ ಸ್ವರ್ಣವಸ್ತ್ರ ಹಾಗೂ ಗಂಧ ಪುಷ್ಪಗಳ ಇಂದಿನ ದಿವ್ಯ ಅಲಂಕಾರವನ್ನು ಕಣ್ತುಂಬಿಕೊಳ್ಳಿ.
ಸಿಂಹಾರೂಢಳಾಗಿ, ಭಕ್ತರ ಸಕಲ ಸಂಕಟಗಳನ್ನು ನಿವಾರಿಸಲು ನೆಲೆಸಿರುವ ತಾಯಿಯ ಈ ಅಪರೂಪದ ದರ್ಶನವನ್ನು ಶ್ರೀ ಕ್ಷೇತ್ರಕ್ಕೆ ಆಗಮಿಸಿ ಕಣ್ಣಾರೆ ಕಂಡು ಕೃತಾರ್ಥರಾಗಿ.
ಇಂದಿನ ಈ ವಿಶೇಷ ಪೂಜಾ ಸಂಭ್ರಮದಲ್ಲಿ ಭಾಗಿಯಾಗಿ, ಉಭಯ ಶ್ರೀಗಳ ಆಶೀರ್ವಾದ ಹಾಗೂ ಅಮ್ಮನ ಕೃಪೆಗೆ ಪಾತ್ರರಾಗಲು ಎಲ್ಲರಿಗೂ ವಿನಂತಿ.
ದೇವಿಯ ದಿವ್ಯ ಸನ್ನಿಧಿಗೆ ಆಗಮಿಸಿ ನಿಮ್ಮ ಬದುಕಿನಲ್ಲಿ ಶಾಂತಿ ಮತ್ತು ಸಮೃದ್ಧಿಯನ್ನು ಪಡೆದುಕೊಳ್ಳಿ.

ಇಂದು ಶಾರದಾ ಸ್ಥಾಪನೆ ಹಾಗೂ ಪೂಜೆ ಜರುಗಿತು. ಶ್ರೀ ಶ್ರೀಮದ್ ಗಂಗಾಧರೇಂದ್ರ ಸರಸ್ವತೀ ಮಹಾಸ್ವಾಮಿಗಳವರ ಶಿಷ್ಯ ಶ್ರೀಗಳಾದ ಶ್ರೀ ಶ್ರೀಮದ್ ಆನಂದಬೋಧೇಂದ್ರ ಸರಸ್ವತೀ ಮಹಾಸ್ವಾಮಿಗಳು ಶ್ರೀ ಜ್ಞಾನ ದೇವತೆಯಾದ ಶಾರದಾ ದೇವಿಯನ್ನು ಆಹ್ವಾನಿಸಿ ಪೂಜಿಸಿದರು.